Un persona ku Iglesia ta rekonosé di a ser inspirá pa Dios, a bisa: “Ma ser mustrá ku prensa ta poderoso pa bon òf pa malu. E agensia aki por alkansá i influensiá e mente públiko manera ningun otro medio lo por. Prensa, kontrolá pa hende ku ta santifiká na Dios, por realmente ser un poder pa bon den hiba hende na e konosementu di e bèrdat.” (Colporteur Ministry, 149). Durante e último seis (6) añanan aki, Iglesia den Karibe Hulandes, a hasi un esfuerso grandi pa apliká e idea di uza prensa pa bon den regalá e komunidat di Aruba, Bonaire i Curaçao bukinan chikitu ku mensahe di speransa.
Na aña 2012 Iglesia a distribuí 50.000 ehemplar di e obra titulá E Gran Speransa. Na 2015, a parti 112.175 ehemplar di Salú i Speransa riba islanan ABC i na Hulanda. Na 2017, nos a distribuí 67.575 di Speransa Pèrdí, Speransa Rekobrá. E aña aki 56.150 ehemplar di Poder di Speransa. Nos a tuma nota di e echo ku e kantidat, e aña aki, a resultá di tabata poko pasobra vários petishon pa mas buki no por a keda satisfasé. E proyekshon pa otro aña ta un total di 59.000 ehemplar di Speransa pa e Famia di Awe.
Na tur, durante e kuater añanan menshoná ariba, nos a distribuí 285.900 piesa di literatura di speransa na un total di mas o ménos 100.000 kas plamá riba e islanan di Aruba, Bonaire i Curaçao. No ta bai pa e kantidat di buki distribuí, nos ta hasiendo un simpel ehersisio estadístiko ku ta ignorá e efisiensia real di nos distribushon di e bukinan. Ohalá nos por a distribuí di tal manera ku kada kas di famia por risibí por lo ménos un ehemplar di e mensahe di speransa. E impakto spiritual, te asina leu, i e historianan ku e impakto ta generá, i ta yega bèk na nos orea, ta duna gran satisfakshon i alegria.
Danki na kada miembro di iglesia ku a invertí su rekurso den e proyekto aki. Danki spesial na e atministrashon di Iglesia i pastornan na Aruba, Bonaire i Curaçao pa e esfuerso i kordinashon di e distribushon di e bukinan pa nan yega den e diferente kasnan. Gratitut ta bai pa e direktornan di publikashon riba kada isla pa promoshon i kordinashon ku e lidernan lokal.
Pa mayor alkanse, i mayor impakto spiritual, nos kier invitá bo pa “download” e aplikashon ku yama “Sharing Hope:” http://www.sharinghope.com/# kaminda por haña akseso na e bukinan menshoná den un forma digital pa nos lesa i kompartí ku otro persona. Di e forma aki nos por sigui plama mensahe disperansa ounke ku e buki físiko por ta skars. – Maranata!
