SIRKULAR NA TUR IGLESIA ATVENTISTA NA ARUBA, BONAIRE I KÒRSOU

Apresiabel ruman,

Risibí un kordial saludo den nòmber di nos gran Dios i Salbador Hesukristu.

Nos por a tuma nota ku djabièrnè 13 di mart 2020 a konfirmá dos kaso di persona infektá ku e vírùs di korona na Aruba i un kaso na Kòrsou. Ámbos pais a dekretá un estado di krísis i a tuma vários medida. Konsiderando ku e situashon riba kada un di e islanan ta varia, i e aserkamentu di e respektivo gobièrnunan no ta meskos, nos ta suponé ku lo tin diferensia den e forma ku iglesia lo
respondé riba kada isla. Sinembargo, tin algun pouta ku ta aplikabel pa nos tur den Karibe Hulandes.

1. No tin pakiko teme i kai den pániko. “Pasobra Dios no a duna nos un spiritu di temor, sino di poder i di amor i di sano huisio” (2 Timoteo 1: 7, Beibel Santu). Den momentunan di krísis manera esaki nos mester ta sobrio pa por duna un testimonio efektivo pa honra nos gran Dios i Salbador. Nos ta sirbi un Dios grandi, poderoso i bondadoso. Laga nos konfi’é i sirbié fielmente.

2. Sigui indikashonnan ku e gobièrnu di nos pais ta duna. “Laga tur hende someté nan mes na e outoridatnan ku ta goberná. Pasobra no tin outoridat ku no ta di Dios, i esnan ku ta eksistí, ta Dios a stablesé nan” (Romanonan 13: 1, Beibel Santu). Ministerio di Salubridat di e respektivo pais ta suministrá informashon di kon pa prevení, fabor sigui esaki.

3. Apliká regla di higiena personal: Laba man frekuentemente, tosa i nister den huki di brasa, keda na distansia di dos meter di hende ku tin grip òf síntoma di grip, si bo ta sinti malu keda kas, etc.

4. Apliká i promové e ocho prinsipionan di salú ku semper Iglesia a promové: nutrishon, ehersisio, awa, lus di solo, temperansia (balansa den tur kos), aire puru, deskanso i konfiansa den Dios.

Konsiderando naturalesa di e pandemia akí, ta parse inevitabel ku hopi di nos lo por keda infektá. Sinembargo, ku nos konfiansa den Dios i siguiendo prinsipionan di salú ku semper Iglesia a siña, nos sistema imunológiko lo ta fuerte sufisiente pa ta mas ku vensedó durante e krísis akí.

Ku Señor por bendishoná ruman, warda ruman i uza ruman pa ta un agente di speransa den e mundu manera e ta aki, te ora Kristu bolbe.

Maranata!

Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh-day Adventists