Iglesia Atventista ta afirmá e dignidat i balor di kada ser humano i ta denunsiá tur forma di abusu físiko, seksual i emoshonal, abusu den seno di famia òf den kualkier otro tipo di relashon. Nos ta rekonosé e ekstenshon global di e problema i e efektonan serio i di bida largu pa ku tur esnan envolví den un situashon di abusu. Konsiente di e echo ku ni iglesia, ni su institushonnan ta imün pa kasonan di abuzu, iglesia a inkluí poutanan den su manual di Iglesia i reglamentu di trabou. Na nivel lokal, a krea un manual pa sirbi komo guia pa protekshon di esnan vulnerabel.
Nos ta tuma relatonan di abusu i violensha na serio i ta organisá workshòp, seminario i diskushonnan regular den iglesia i komunidat. Ademas, na desèmber di aña 2009 a firma un aliansa ku e.o. Fundashon Bos di Hubentut pa por traha huntu na prevenshon di abusu seksual di menornan.
Konsiderando, ku pa keda ketu i keda indiferente den kasonan di abusu di menor ta nifiká sostené, apoyá, perpetuá i probablemente ekstendé tal kondukta, nos ta aseptá nos responsabilidat pa koperá ku otro servisionan profeshonal i gruponan di trabou pa skucha i yuda esnan ku ta sufri pa motibu di abusu. Pa tal motibu, nos ta kurashá tur persona ku ta víktima di un òf otro forma di agreshon seksual pa akudí na Jeugd en Zeden Zaken, òf otro instansia konserní, òf un persona di konfiansa ku por yuda bo kanalisá bo keho na e kaminda apropiá.
