98 Dia di Gratitut

E outor di Salmo 107 ta invitá nos pa duna danki na Dios pa SU bondat. “Duna gradisimentu na SEÑOR, pasobra E ta bon; pasobra Su miserikòrdia ta pa semper” (Salmo 107: 1). Un bida i aktitut di gradisimentu, tin benefisio notabel pa e ser humano. “Hende ku ta praktiká gratitut regularmente dor di tuma tempu pa nota i reflehá riba kosnan ku nan ta agradesido na dje, ta eksperensiá mas emoshon positivo, sinti mas bibu, drumi mihó, ekspresá mas kompashon i bondat, i hasta tin sistema imunológiko mas fuerte.”[1]

Di un banda, e kreyente ta duna diesmo na Dios komo un ekspreshon di su fieldat, di otro un banda, ofrenda ta ser duná komo un akto di gratitut pa loke Dios a hasi den su bida. Ofrenda ta un asuntu di rekonosé Dios Su bendishon, i tin di hasi ku nos disposishon pa rekonosé Dios komo Kreador, Doño i Dunadó di tur bon regalo i tur don perfekto (Santiago 1: 17).

Kuminsando aña 2018, tur miembro i no miembro di iglesianan Atventista na Aruba, Boneiru i Kòrsou tin e oportunidat pa presentá un ofrenda spesial di gratitut na Dios na fin di kada aña pa e múltiple bendishon nan ku nan a risibí di Dios kada dia. E plan ta pa kada miembro òf famia apartá un florin (òf su ekivalente na otro moneda) kada dia pa 98 dia largu. Pues, tur famia kuminsando dia 8 di sèptèmber 2018 lo kuminsa apartá su ofrenda kada dia pa finalmente entregá esaki na su iglesia dia 8 di desèmber 2018. E ofrenda total lo ser rekohé dia 8 desember 2018 den tur e kongregashonnan Atventista na Aruba, Boneiru i Kòrsou. E dia ei ta e dia grandi di gratitut i selebrashon di Dios Su bondat den nos bida personal, na iglesia i na nos trabou.

E aña aki, 2018 e ofrenda lo ser repartí di e siguiente manera:

  • 50% ta keda pa e iglesia lokal, pa un proyekto ku e iglesia mes ta disidí.
  • 10% pa e kampo lokal. E kampo lokal ta disidí pa kua proyekto kier uza e ofrenda di gratitu.

40% di tur e ofrenda rekohé den e teritorio di union lo bai pa establesé un stashon di radio na Aruba. Pa kumpra e ekiponan nesesario pa kompletá e ret di transmishon di islanan ABC. Si sobra, e resto di e fondi lo ser uzá pa sostené i desaroyá Adventist World Radio Network, Dutch Caribbean.

[1] Derrick Carpenter, https://www.happify.com/hd/the-science-behind-gratitude (último chèk 10 yüni 2018)

 

Bo por komparti e artikulo

lodo sda church
UNION KARIBE HULANDES 
© 2018 Dutch Caribbean Union of Seventh Day Adventist