Lanthùis Gaito ta un bibienda di e promé parti di siglo 19. Na aña 1834 Marten Douwens Teenstra ta menshoná e Lanthùis i su funshon den su buki. Ántes e tabata un rancho, un bibienda kaminda tabata kria bestia. Tabata un kombinashon di un bibienda ku aktividat ekonómiko te ku aña 1950 ainda.
Despues Barclays Bank a tum’é over (promé ku aña 1979). Riba un potrèt di 1981 por mira ku Barklays Bank tabata den e lanthùis ainda. Un momentu CITCO a hañ’é for di Barclays. Dia 22 ougùstùs 1988 Iglesia Atventista a trok’é pa un propiedat na Cornelisbergplein No. 7 (Nieuwestraat 25) ku CITCO Bank. E tempu ei for di Lanthùis Gaito Iglesia Atventista tabata sirbi e kongregashonnan i institushonnan na Aruba, Bonaire i Curaçao direktamente.
Lanthùis Gaito ta un monumento protehá inskribí dia 21 di febrüari 2005 den e registro di monumentonan protehá konforme artíkulo seis (6) di e Ordenansa di Monumentonan di Kòrsou (AB 1990 no 5).
Na yüni 2013 un kandela den e parti nortwèst di e edifisio a fòrsa evakuashon di e ofisina di iglesia Atventista pa Kòrsou i Bonaire for di e lanthùis. E asosiashon di iglesianan na Kòrsou i Bonaire tabatin plan pa bende e edifisio. Sinembargo, na yüni 2015 despues ku tabatin un restrukturashon di Iglesia Atventista na Aruba, Bonaire i Curaçao, nan a disidí di regalá e lanthùis na e Ofisina Regional ku ta karga e nòmber Union Karibe Hulandes. Despues di a renobá e lanthùis, e Ofisina Regional pa Aruba, Bonaire i Curaçao a okupá e lanthùis.
Union Karibe Hulandes ta un unidat miembro di Iglesia mundial di Atventistanan di shete dia i ta situá den e teritorio di Asosiashon General di Atventistanan di shete dia – Divishon Interamerikano. E ofisina di Union Karibe Hulandes ta situá na Landhuis Gaito, Scalaweg 7, Kòrsou. E union, esta, ofisina regional, ta kordiná e mishon di Iglesia Atventista denter di e teritorio di Aruba, Bonaire i Kòrsou, i ta operá vários institushon, ku ta inkluí institushonnan di edukashon, emisora radial, publikashon, salubridat i entidatnan filantrópiko ku ta realisá aspektonan spesial di e mishon di Iglesia Atventista di shete dia na e poblashon di e islanan. Na Kòrsou, nos ta sirbi bintinuebe (29) kongregashon, tres (3) skol di fundeshi, un hòspital na dos (2) lokalidat i un agensia pa desaroyo i alivio.