Update COVID – 19

Konsiderando 118,000 kaso konfirmá di e malesa di e vírùs di korona den mas di 110 pais na mundu ku e riesgo haltu pa sigui plama, ayera, dia diesun di mart dos mil binti, Organisashon Mundial di Salú, a deklará COVID-19 un pandemia. Rason primordial pa tal deklarashon ta ku e plamamentu di e malesa aki ta hopi probabel i ku paisnan mester prepará pa e posibel transmishon komunitario na gran eskala. E situashon aki lo por ta rason pa adaptá plannan di biahe, motivá paisnan i siudatnan pa definí plannan di karentena i kambio den eventonan públiko kaminda tin mester.

Iglesia a disidí pa hasi adaptashon na plannan di biahe pa algun pais. Te asina leu, a kanselá masha poko aktividat. Ta importante pa indiká akinan, ku te asina leu, no tin kambio pa ku e seshon di Konferensia General na yüni. Algun biahe di obreronan pa aktividatnan grandi den paisnan estranhero den luna di mart i aprel a keda kanselá.

Iglesia ta rekomendá rumannan pa sigui e práktikanan di higiena personal manera labamentu di man ku frekuensia, evitá pasa man na kara, wowo, i boka. Tosa i nister den èlebog, lensu of duki. Evitá, te kaminda ta posibel, lugánan di aglomerashon di hende, etc.

Tambe, nos ke urgi nos rumannan pa:

1. Resa pa propio siguridat i ser un agente di speransa den un tempu di pániko i insertidumbre manera esaki.
2. Sigui indikashonnan ku ta bini di e outoridatnan di sivil i ministerio di salubridat di nan respektivo pais.
3. Apliká i kompartí e ocho prinsipionan natural di salú ku semper Iglesia a promové: NEWSTART

Nutrishon: Alimentá bo mes i bo famia di un forma saludabel. Evitá karni, mangel, ekseso di vèt i suku. Kome sufisiente fruta i berdura. Por lo ménos un fruta pa dia pa persona.
Ehersisio: Move por lo ménos shete mil sinkushen paso pa dia. Kanamentu ta e forma mas seif pa hasi ehersisio i no ta kosta nada. Naturalmente por skohe e tipo di ehersisio ku ta sinti mas kómodo kuné.
Water (Awa): Bebe por lo ménos un liter di awa pa dia. Awa ta yuda flùsh sustansianan no deseabel for di nos sistema, regulá nos temperatura di kurpa, i lubriká nos skarnirnan.
Solo: Eksposishon moderá na lus di solo ta duna energia, destruí vírùs i mikrobio pafó di nos kurpa i produsí vitamina E.
Temperansia: E palabra aki ta derivá di ingles bieu i ta nifiká balansa òf moderashon den tur kos. Nada di mas no ta bon, algu di ménos tambe ta malu. Tur loke nos ta hasi mester di un balansa prudente.
Aire puru: Importante pa eksponé nos mes na aire limpi. Aktividatnan den aire liber kaminda tin ménos polushon ta kontribuí na nos felisidat, limpiesa di nos pulmonnan, duna nos mas energia i un mente mas skèrpi.
Rest (Deskanso): Traha ta importante, sosegá tambe! Sosiegu ta permití nos múskulonan, nèrvio, wesu i tehidonan haña tempu pa edifiká di nobo.
Trust (Konfiansa den poder Divino): Finalmente, konfiansa den Dios nos Tata. Nos no tin kontròl di tur kos. E ta inevitabel ku e vírùs por yega serka nos pero nos tin e promesa ku “Esnan ku ta konta ku SEÑOR
ta manera Seru di Sion: nunka nan no ta tambaliá, nan ta firme sintá pa semper. Manera e serunan rondó di Herusalèm SEÑOR ta rondoná su pueblo for di awor te den tur eternidat!” (Salmo 125: 1,2).

Nos no por evitá tur kos, pero ku poder di Dios i obediente na Su reglanan di salú, nos por sali dilanti i hasi un diferensia apesar di e situashon kaótiko. Maranata!

Fuentenan di informashon
1. https://time.com/5791661/who-coronavirus-pandemic-declaration/
2. https://www.who.int/news-room/detail/10-03-2020-covid-19-ifrc-unicef-and-who-issue-guidance-to-protect-children-and-support-safe-school-operations

Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh-day Adventists