Tempu di Atvènt

Pa un gran mayoria di e denominashonnan kristian, e tempu di Atvènt ta e periodo di preparashon pa e fiesta di Pasku di nasementu.[1] E periodo ta kuminsá kuater (4) djadumingu promé ku dia di Pasku i ta terminá e anochi di Pasku. E tempu di atvènt ta karakterisá pa un kantidat di aktividat religioso, komunmente, ku ta enfoká riba un mensahe di pas, goso i sirbishi na esnan ménos afortuná. Tur esaki masha bon i bunita. Sinembargo, e énfasis komersial i e enfoke riba e nasementu di Hesukristu ta preokupante.

Mi ta un testigu personal di e echo kon algun hende ta realisá mas gastuku nan entrada pa selebrá, entre otro, un akontesimentu ku a pasa siglonan pasai no tin un noshon di e nifikashon pa ku e presente i futuro serkano. Ekustumber di gasta mas di loke nos ta risibí ta asina parti di nos “kultura” denKaribe Hulandes, ku el a keda komikamente ekspresá pa Ompi Stropi i su ekipo den e obra teatral titulá:“Desèmber un Lokura, Yanüari un Sekura.”

Mi mayor preokupashon ta ku nos ta asina apsorbé pa e kosnan material i supuestamente ta enfoká riba selebrashon di e nasementu di Hesus. Evidentemente, nos no ta para ketu ku e nasementu di Hesus ta parti di un plan ku ta inkluí e echo ku El lo bini atrobe na mundu. E biaha aki no manera un beibi vulnerabel sino komo Rei di reinan i Señor di señornan.

Ta importante pa nos realisá ku nos ta bibando den un Tempu di Atvènt real. Den e tempu promé ku Hesukristu bolbe bek manera El a primintí. Ora ku Hesus a nase komo beibi na Bètlehèm siglonan pasa, tabata kumplimentu di promesa di Dios i di profesianan di Beibel. Tristu, ku algun (kisas mayoria) di esnan ku mester tabata sperando riba djE, no tabata prepará pa risib’É. E regreso di Hesus ku nos ta sperando, tambe lo ta kumplimentu di promesa i profesianan di Beibel. Nos no sa ki dia El lo bini pero Beibel ta indiká bon kla unda nos ta den historia di e mundu aki.[2] Di akuerdo ku e apòstel Pedro su interpretashon di Skritura, “último dianan” a kuminsá for di tempu di Pentekòste[3] i opviamente último dianan lo terminá ora ku Hesukristu paresé riba nubianan di shelu. Pasobra, “asina Kristu tambe a ofresé ún bia e sakrifisio di su bida pa kita piká di hopi hende. E di dos bia ku E bini, E no ta bini pa karga piká di hende, pero pa salba esnan ku ta sper’É.”[4]

Asina ta, segun nos ta disfrutá di e dianan di fiesta, laga nos keda alerta i na tinu. “Pasobra Dios a mustra su bondat dor di ofresé salbashon na tur hende. Bondat di Dios ta siña nos renunsiá un bida sin Dios, ku pashon mundano, i hiba un bida prudente, rekto i dediká na Dios, riba e mundu akí, miéntras nos ta warda ansiosamente riba e dia felis ku nos speransa lo bira realidat. Esei ta e dia ku gloria di nos gran Dios i Salbador Hesu-Kristu lo ta manifestá.”[5] E buki di Mateo, e promé buki riba e lista di bukinan di Tèstamènt Nobo, ta kuminsá ku e anunsio di Hesus Su nasementu komo “Dios ku nos,”[6] i ta terminá ku e promesa di Hesus Su presensia ku nos te ora ku E bolbe bek personal, literal, visibel, oudibel i glorioso.[7] Finalmente, mi kier invitá bo pa klek riba e link abou pa habri e karchi di Pasku ku nos a skohe pa bo:

https://www.123greetings.com/events/christmas/religious/a_christmas_prayer.html  – Maranata!


[1] https://bijbel.eo.nl/geloofsvragen/wat-is-advent

[2] Daniel kapítulo 2, 7, 8, 9, i 12; Echonan 2: 7

[3] Echonan 2: 14 – 24

[4] Hebreonan 9: 28

[5] Tito 2: 11 – 13

[6] Mateo 1: 23

[7] Mateo 28: 20; Echonan 1: 11; Lukas 24: 36-43; Mateo 24: 27,30; Revelashon 1: 7; 1 Tesalonisensenan 4: 16-18; Mateo 16: 27; Revelashon 19: 11-16

Bo por komparti e artikulo

lodo sda church
UNION KARIBE HULANDES 
© 2018 Dutch Caribbean Union of Seventh Day Adventist