Si Dios a trese bo na dje; E lo hiba bo dor di dje!

Si bo ta lesando e blog post aki, ta pasobra Dios a permiti bo mira aña 2019. P’esei, e pensamentu di e siman aki ta: “Si Dios a trese bo na dje; E lo hiba bo dor di dje!” Kiermen, si Dios a trese bo na aña 2019 ta pasobra E lo hiba bo dor di dje.

E dia ku Dios a saka e pueblo di Israel for di Egipto, El a bisa nan: “For di awe e luna akí ta pa boso e promé luna di aña.”[1] Pues Dios tabata introdusiendo su yunan den un aña nobo. Sinembargo, mas ku un kambio di kalender, Dios tabata ofrese e hendenan aki un kambio di eksperensia. Riba e dia ei, nan kalender a kambia, nan status a kambia di katibu pa hende liber i nan a bira un nashon independiente bou di mando di e Dios di shelu.

E kambio (nan) aki ta impliká ku awor mester dependé riba Dios Su sabiduria, Dios Su boluntat, Dios Su guiansa pa sobrebibi. Awor, nan no ta bou di mando i kuido di e egipsionan, sino bou di direkshon i kuido di e Dios bibu ku a krea shelunan i tera. Beibel ta indiká ku “ora fárao a laga e pueblo bai, Dios no a guia nan riba e kaminda ku ta bai tera di filisteo, ounke esei tabata e kaminda di mas kòrtiku. Pasobra Dios a pensa: ‘Si nan haña nan den guera, lo duel nan podisé ku nan a sali for di Egipto i nan lo ke bai bèk.’ P’esei Dios a laga nan pasa un otro kaminda den desierto pa bai Laman Kòrá.”[2] Ademas, Beibel ta relatá ku nan tabata bou di e guia konstante di Señor Dios: “Den dia SEÑOR tabata bai nan dilanti den un pilá di nubia pa mustra nan kaminda i anochi den un pilá di kandela pa duna klaridat. Asina nan por a biaha di dia i anochi, pasobra semper e pilá di nubia òf e pilá di kandela tabata bai nan dilanti.”[3]

Moises i e hendenan tabata den un desierto. Tabata mas ku dos (2) mion hende ku a sali for di Egipto.[4] E kantidat di hende ei ta rekerí hopi kuminda i awa. Ta ser kalkulá ku pa e kantidat di hende ei lo tin mester di por lo menos un punto tres (1.3) mion kilo di kuminda i kuarenta i un (41) mion liter di awa pa dia. Tabata Dios mes ku a sòru pa e hendenan aki kuarenta (40) aña largu den un desierto.

Si Dios por a sòru pa mas ku dos (2) mion hende kuarenta (40) aña den un desierto, ki desafio mi tin den 2019 ku Dios no por yuda mi kune? Kondishon di e mundu aki, skarsedat di plaka, traishon humano, ni enfermedat, etc. no mester ta un preokupashon pa mi, “pasobra mi tin sigur ku ni morto ni bida, ni angel ni outoridat, ni kos presente ni kos futuro, ni podernan spiritual, ni e lugá di mas altu ni esun di mas profundo, ni niun otro kos ku Dios a krea, no por separá nos nunka di e amor ku Dios a mustra nos den persona di Kristu-Hesus nos Señor.”[5] – Si Dios a trese bo na dje; E lo hiba bo dor di dje! Maranata.

[1] Eksodo 12: 2

[2] Eksodo 13: 17,18

[3] Eksodo 13: 21, 2

[4] Eksodo 12: 37

[5] Romanonan 8: 38, 39

Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh Day Adventist