Orashon pa Venezuela

Henter mundu su kara ta wak direkshon di e krísis polítiko na nos pais bisiña, Venezuela. Segun e tenshon ta eskalá i e mundu internashonal ta tuma posishon na fabor òf kontra di Maduro un banda i Guaidó e otro banda,[1] amigu i konosínan di Venezuela ta pidi pa nos resa pa nan. Iglesia Atventista den Karibe Hulandes tin un relashon masha yegá ku Iglesia na Venezuela. E mensahe Atventista a yega na nos islanan ku barku ku a sali for di La Guaira, Venezuela. Pa mas ku bintisinku (25) aña iglesia den Karibe Hulandes tabata konektá ku Iglesia Mundial via Venezuela. Awe, ounke Iglesia, komo organisashon, no ta dependé di Venezuela, e laso di amistat i fraternidat ta hopi fuerte.

E informe ku nos a risibí djaweps 24 di yanüari 2019 ta bisa ku “tin hopi tenshon, ekspektativa i violensia. E ambiente no ta esun mihó na e momentunan aki. Danki Dios e Iglesia ta bon, aktivo i envolví.” Nos ta yama danki na Dios ku Iglesia ta sigui fuerte i marchando apesar di e situashon. Danki na Dios, ku e klima polítiko no ta unu ku ta direktamente hostil pa ku iglesia. Ounke, evidentemente, krísisnan manera esun ku Venezuela ta pasando aden por afektá e proklamashon di evangelio den un forma negativo.

Iglesia, komo organisashon, no tin ni interes ni rason pa tuma un posishon na fabor of kontra e partidonan en kuestion. Sinembargo, nos ta sigui e indikashonnan for di e páginanan inspirá ku ta bisa “P’esei, promé ku tur kos, mi ta eksortá pa súplika, orashon, petishon i gradisimentu wòrdu hasí pa tur hende, pa reinan i tur esnan ku ta den outoridat, pa nos hiba un bida trankil i ketu den tur santidat i dignidat. Esaki ta bon i aseptabel den bista di Dios nos Salbador, Kende ta deseá pa tur hende wòrdu salbá i yega na konosementu di e bèrdat.”[2]

E outor di e frasenan aki, esta San Pablo, tabata biba bou di un régimen ku direktamente tabata hostil pa ku Iglesia. El a muri komo mártir na man di un emperador romano kruel. Apesar di su sirkunstansia, e apòstel ta roga pa hasi orashon komo un prioridat pa e outoridatnan sivil. Nos no ta insinuando ku ningun outoridat sivil aktual ta kruel, e punto ta si Pablo ta konsiderá ku mester hasi orashon pa gobernantenan kruel, di su tempu, ku ta persiguí Iglesia, kuantu mas nos mester resa pa e outoridatnan sivil aktual.

E apòstel ta añadí e rason pa kua mester resa. Pa hiba un bida trankil i ketu, den tur santidat i dignidat. Ta pasobra orashonnan asina ta “bon i aseptabel den bista di Dios.” Tambe, Dios kier pa tur hende salba i konosé e bèrdat. Pues no importá ki banda bo ta polítikamente, Si bo kier pa trankilidat i pas reina na Venezuela, si bo kier hasi loke ta bon i aseptabel den bista di Dios, si bo ta deseá pa tur hende salba i konosé bèrdat, uni ku nos den orashon pa Venezuela. – Maranata!


[1] https://www.miamiherald.com/news/nation-world/world/americas/haiti/article225070430.html

[2] 1 Timoteo 2: 1 – 4 (Vershon: Beibel Santu, Editorial Evangeliko)

Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh-day Adventists