E inisiativa di Ofrenda di Gratitut, di Union Karibe Hulandes, NO TA UN PLAN PA REKOUDÁ FONDO sino ta fasilitá kada persona, sea miembro òf no miembro di e iglesianan Atventista na Aruba, Boneiru i Kòrsou e oportunidat pa presentá un ofrenda spesial di gratitut na Dios na fin di aña pa e múltiple bendishonnan ku Dios a duna kada un durante aña.
Beibel Santu, editorial Evangéliko, ta bisa “Esun ku ofresé sakrifisio di gradisimentu ta onraMi.” Ke men, e presentashon di ofrenda di gratitut ta un forma di honra Dios. Pa medio di e ofrenda di gratitut, kada aña di nobo, nos tin e oportunidat pa honrá Dios den un forma tangibel. Gratitut i amor pa Dios ta tuma un forma konkreto den nos ofrendanan, i Dios, pa medio di Su Iglesia, ta usa e rekursonan ku yega den Su mangasina pa edifiká reino di Dios riba tera I alkansá otro ku e mensahe di salbashon.
Di e mesun manera ku nos a hasi aña pasá, kada persona òf famia ta apartá un florin (òf su ekivalente na otro moneda) kada dia pa nobentiocho dia largu. Pues, tur famia, kuminsando dia shete di sèptèmber dos mil diesnuebe lo kuminsá apartá su ofrenda kada dia pa finalmente entregá esaki na su iglesia dia shete di desèmber dos mil diesnuebe. Dia shete di desèmber dos mil diesnuebe, lo rekohé e ofrenda total den tur e kongregashonnan Atventista na Aruba, Boneiru i Kòrsou. E dia ei ta e dia grandi di gratitut i selebrashon di Dios Su bondat den nos bida personal, na iglesia i na nos trabou.
E aña aki, dos mil diesnuebe, lo repartí e ofrenda di e siguiente manera:
- Sinkuenta porshento ta keda pa e iglesia lokal, pa un proyekto ku e iglesia mes ta disidí.
- Dies porshento pa e kampo lokal (asosiashon òf mishon). E kampo lokal ta disidí pa kua proyekto lo uza e porshon ei di e ofrenda di gratitut ku e lo risibí.
- Kuarenta porshento pa un proyekto spesial. E aña aki e kuarenta porshento lo bai pa kompletá e kompleho di baño na e kampamentu na San Sebastian, Curaçao.
Kada kampo lokal (asosiashon òf mishon) mester establesé kua ta e proyekto spesífiko ku lo risibí e dies porshento aloká. Meskos tambe kada iglesia lokal mester determiná kua proyekto lo risibí e sinkuenta porshento di loke e iglesia risibí. Mishon Aruba i Bonaire lo entregá e kuarenta porshento na Asosiashon di Curaçao via Union Karibe Hulandes.
