Ofrenda Di Gratitut 2020

Nos ke yama Dios danki pa e kresementu notabel di entrega di Ofrenda di Gratitut na Aruba, Boneiru i Kòrsou. E oumento por ta indikashon di un mihó komprondementu di e inisiativa. Pasobra, e inisiativa di Ofrenda di Gratitut, di Union Karibe Hulandes, NO TA UN PLAN PA REKOUDÁ FONDO. Mas bien, e ta fasilitá kada persona, miembro òf nò di Iglesia Atventista na Aruba, Boneiru i Kòrsou, e oportunidat pa presentá un ofrenda di gratitut spesial na Dios na fin di aña pa asina gradisí pa bendishon múltiple ku Dios a duna kada unu durante aña.

Nos tin hopi motibu pa yama Dios danki. Pa bida i pa Dios Su kuido, protekshon, provishon i guia apesar di e krísis global ku nos ta bibando. Apòstel Pablo ta animá nos pa “yama Dios danki bou di tur sirkunstansia, pasobra esei ta loke Dios ta deseá di boso komo hende ku ta kere den Kristu” (1 Tesalonisensenan 5: 18).

Pues komo hende ku ta kere den Kristu, kada persona òf famia ta apartá un florin (òf su ekivalente na otro moneda) kada dia pa nobentiocho dia largu. Kuminsando dia 5 di sèptèmber 2020 lo kuminsá apartá e ofrenda diariamente pa finalmente entregá esaki na iglesia dia 5 di desèmber 2020. Dia 5 di desèmber 2020 lo rekohé e ofrenda total den tur e kongregashonnan atventista na Aruba, Boneiru i Kòrsou. E dia ei ta e gran dia di gratitut i selebrashon di Dios Su bondat den nos bida personal, na iglesia i na nos trabou.

E aña akí, 2020, lo repartí e ofrenda di e siguiente manera:

(50%) Sinkuenta porshento ta keda pa e iglesia lokal, pa un proyekto ku e iglesia mes ta disidí.
(10%) Dies porshento pa e kampo lokal (asosiashon òf mishon). E kampo lokal ta disidí pa kua proyekto lo uza e porshon ei di e ofrenda di gratitut ku e lo risibí.
(40%) Kuarenta porshento pa un proyekto spesial. E aña akí e kuarenta porshento lo bai pa reinstalashon di e sistema di elektrisidat i pènel solar na ofisina di Mishon Boneiru, i ekspanshon di e edifisio pa akomodá un espasio pa bende kuminda saludabel na Boneiru. Kualke surplus di e alokashon den komparashon ku e presupuesto di e proyekto, lo bai pa e proyekto di ‘Hope Media Center’ di Mishon Aruba.

Kada kampo lokal (asosiashon òf mishon) mester establesé kua ta e proyekto spesífiko ku lo risibí e dies porshento aloká. Meskos tambe kada iglesia lokal mester determiná kua proyekto lo risibí e sinkuenta porshento di loke e iglesia risibí. Mishon Aruba i Asosiashon di Kòrsou lo entregá e kuarenta porshento na Mishon Boneiru via Union Karibe Hulandes.