Mi no kier ta pashènt!

Awe mainta mi a bai hasi un sita pa mi mama na un spesialista, i a logra haña un sita ku e médiko spesialista te den e último siman di ougùstùs 2019. Durante e kombersashon ku e asistènt mi a bis’é ku “mi no kier ta pashènt!” Ora ku el a bisa mi ku mi mama mester pidi un otro “machtiging” pasobra esun ku e tin a kaduká pa e fecha ei, mi a hari anto e asistènt ku un sonrisa riba su kara a pidi mi despensa pa e situashon.

E ekspreshon di no kier ta pashènt tabata sinsero i spòntan. Alabes, e asuntu di no kier ta un pashènt ta un deseo idealístiko tambe. Ningun hende kier ta pashènt. Tur hende kier ta bon di salú. Realidat ta ku nos tur na un momento òf otro ta, òf lo bira un pashènt, i mester hasi uzo di e servisionan di e profeshonalnan den e kadena i sistema di salubridat di nos respektivo pais.

Konsiderando ku enfermedat i sufrimentu ta parti di bida humano, Dios, despues di a libra Israel for di sklabitut i tabata den e proseso di establesé un nashon teokrátiko a presentá na e nashon nobo un estilo di bida ku ta inkluí un kondishon di salú públiko limpi, prevenshon di enfermedat, dieta saludabel huntu ku lèsnan spiritual. “El a bisa: ‘Si boso skucha bon loke Ami, SEÑOR, boso Dios, bisa i hasi loke Mi pidi, si boso atené boso na mi mandamentunan i mi leinan, lo Mi spar boso di e enfermedatnan ku Mi a kastigá e egipsionan kuné. Ami ta SEÑOR, Ami t’Esun ku ta kura boso.’”[1]

E kreyentenan di Tèstamènt Nobo i e kristiannan di promé siglo tabata mira salú di hende komo algu integral. Ta for di e perspektiva ei e apòstel Huan a skibi: “Kerido ruman, mi ta resa pa kos bai bon ku bo den tur sentido, pa bo por ta bon di salú, meskos ku bo bida spiritual ta salú.”[2] Tabata mas o ménos den e di kuater siglo ku e mensahe kristian “wholistiko” a keda distorshoná i a kuminsá siña ku abusu di e kurpa i ku separashon di sosiedat hende por gana piedat.[3]

E ta parse, komo ku hende a pèrdè òf ignorá e plan di Dios pa ku salú di hende, humanidat mester a paga un preis karu den edat medio ku morto di miónes di siudadano europeo dor di kiebro di epidemia di kólera, plaga i disenteria. Tur esaki tabata innesesario, pasobra Dios a duna reglanan di higiena den Su palabra ku por a  prevení e katastròf aki.

E ta imposibel pa keda sin bira un pashènt, pero si nos studia i obedesé Dios Su plan di salú pa hende, nos por biba largu, nos famia lo ta felis, nos pais por invertí mas plaka den formashon di hende. Dios a primintí salú i prosperidat, esnan ku skucha i obedesé lo evitá di ta pashènt. – Maranata!


[1] Eksodo 15: 26

[2] 3 Huan 2

[3] Earle E. Cairns. Christianity Through the Centuries: A History of the Christian Church. Grand Rapids, Michigan: Zondervan Publishing House, (Third Edition, Revised and Expanded), 1996. p. 144 – 149.

Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh-day Adventists