Korona vírùs – NO TIN MOTIBU DI PANIKO!

Na desèmber 2019 un brote di un korona vírùs nobo a kuminsá den e region di Wuhan na China. E vírùs aki por okashoná e malesa ku ta keda denominá komo COVID-19. Mayoria pashènt ku e vírùs aki ta haña keintura i molèster ku halamentu di rosea (entre otro tosamentu). Den kuestion di simannan a surgi informe di hende infektá na tur kontinente na mundu. Último dianan informe a drenta ku Algeria, Oustria, Kroasia, Alemania, Spaña i Suisa a informá kasonan di COVID-19 vinkulá ku Italia, miéntras ku Bahrain, Irak, Kuweit, Oman i Pakistan a informá kasonan di COVID-19 relashoná ku Iran. Awe, promé di mart 2020 a konfirmá e promé kasonan di COVID-19 den e region di Karibe (St. Maarten parti franses i Repúblika Dominikana). No ta konosí ku tin kaso di sospecho ni konfirmashon di COVID-19 den e teritorio di Karibe Hulandes.

E forma ku medionan sosial a bin ta manehá e notisia di e desaroyo di e brote viral aki, i e echo ku outoridatnan sivil di paisnan grandi ta dediká asina tantu atenshon na e asuntu aki, inkluso lidernan spiritual lokal i internashonal a ekspresá tokante e tópiko aki, a bin ta duna un sentido di alarma sin presedente na e brote di Korona vírùs. Un di e motibunan, kisas hustifiká tambe, pa e alarma ta e echo ku hopi tokante e vírùs nobo aki ta deskonosí.

Sin embargo, loke ta konosí ta ku tin muchu ménos kaso fatal kompará ku otro enfermedatnan kontagioso ku nos a kustumbrá di biba kuné. Tambe, ta konosí ku tin malesanan no kontagioso ku ta kobra mas bida humano pa aña ku e tendensia aktual di e vírùs nobo di korona. Apsolutamente, no ta e intenshon pa bagatelisá e menasa di e brote viral nobo aki, sin embargo e sensashon i pániko den sosiedat ta for di proporshon kompará ku e echonan konosí tokante e brote di e vírùs.

Ekspertonan ta indiká, por ehèmpel, ku e máskara komun ku siudadanonan ta bisti no ta yuda kontra kontagio. E máskaranan ku por yuda kontra kontagio ta limitá i ta personanan di trein lo por usa nan i lo no por usa tipo di máskaranan asina pa largu tempu pasobra ta difísil pa hala rosea ku nan. E máskaranan ku ta disponibel riba merkado solamente por yuda pa un portadó di e vírùs no pasa COVID-19 pa un otro persona. Masha interesante, apesar di e opinion di ekspertonan, pa tuma nota kon e gobièrnu merikano a pidi e kompania 3M pa produsí 43 mion máskara den kuadro di e brote di korona vírùs. Esei ta pasobra e públiko den su pániko ta kumpra asina tantu maskará ku no ta keda sufisiente pa e profeshonalnan di salú por haña pa nan usa pa nan mes pa protehá nan pashèntnan di keda infektá ku vírùs ku nan komo profeshonal di salú por ta karga.

Kisas un di e benefisionan ku nos lo por kosecha for di e “propaganda viral” aki ta un konsenshi global di higiena públiko. Vários iglesia a rekomendá nan miembronan pa no duna man, sunchi otro, brasa otro, etc. Tambe a instalá bòter di “sanityzer” na entrada pa tur hende desinfektá man promé ku nan drenta nan lugá di enkuentro i adorashon. E medidanan aki ta yuda sigur pa minimalisá chèns pa kontagiá ku kualke malesa viral konosí i deskonosí. Kisas ta bon pa nos kontinuá ku implementashon di e poutanan aki komo praktiká regular pa evitá brote di COVID-19, influenza, i tur otro malesa kontagioso ku práktika di regla di higiena públiko por kontrarestá. – Maranata!

Algun fuente relevante di informashon:

  1. https://gobiernu.cw/nieuw/informashon-i-tepnan-pa-preveni-entre-otro-corona-virus/
  2. https://www.who.int/emergencies/diseases/novel-coronavirus-2019
  3. https://www.facebook.com/179897995400002/posts/2868698853186556/
  4. https://www.youtube.com/watch?v=jv8vDZKAOCA

Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh-day Adventists