Dilema

Por lo general e término dilema ta indiká un eskoho for di por lo ménos dos opshon deseabel o no deseabel. Tambe ora tin konflikto di prinsipio i balornan nos por papia di un dilema. Por ehèmpel, e diskushon rondó di kasamentu di parehanan di mesun sekso ta un dilema moral ku nos ta konfrontando komo sosiedat isleño. Resientemente, na Hulanda mas di dosshen (200) protestant evangéliko a firma e tradukshon na hulandes di e Deklarashon di Nashville.[1] Evidentemente, esaki a kousa un reakshon fuerte di parti di e gruponan ku ta sostené e komunidat LGBT.

Den Karibe Hulandes, por lo ménos un partido polítiko di orientashon humanista kristian a deklará públikamente di ta na fabor di matrimonio di mesun sekso. E deklarashon polítiko aki a risibí reakshon fuerte for di e gremio protestant evangéliko den Karibe Hulandes. E ta komprendibel ku tur kristian ku ta tuma Beibel na serio ta kontra matrimonio di mesun sekso. Beibel ta kla ku matrimonio ta monógamo i heteroseksual. P’esei, atventistanan ta kere ku “Dios a instituí matrimonio den e hòfi di Eden i a keda afirmá pa Hesukristu di ta un instituto tantu monógamo komo heteroseksual, un union pa bida largu di un kompañerismo amoroso entre un hòmber i un muhé.”[2]

Loke ta kousa e dilema ta ku e diskushon tokante di matrimonio di mesun sekso ta un asuntu di pólisa públiko. E asuntu ta si gobièrnu di pais por definí matrimonio otro for di e manera ku Beibel i/òf iglesia ta komprondé matrimonio. Atventistanan di shete dia ta balorá i ta promové separashon entre iglesia i estado. Ta nifiká ku, pa por lo ménos Iglesia Atventista, gobièrnu no por imponé un siñansa Bíbliko òf doktrina di un iglesia partikular riba e sosiedat.

Gobièrnu mester ta un institushon neutral ku ta respetá i permití tur siudadano biba liber sea loke e ta kere ta bèrdat òf falsu. E otro desafio ta ku miéntras no por prueba ku sierto aktonan, ounke moralmente robes, no ta hasi daño na otronan, gobièrnu no por prohibié pasobra Beibel, i òf nos komo kristiannan ta haña ku e ta robes. Pues, e dilema ta iglesia su lealtat na Dios Su palabra, i e deseo pa tur hende biba di akuerdo ku e Palabra di Dios kontra e prinsipio moral di separashon di iglesia i estado, loke ta un prinsipio Bíbliko tambe.

Tin dos punto importante ku por yuda nos sali for di e dilema aki:

  1. “Den un sosiedat liber, individuonan mester por hasi eskohonan moralmente robes ku no ta kousa daño serio, serkano i inmediato na otronan.”[3] Dios a krea hende liber, i a duna hende e oportunidat di skohe robes.[4]
  2. Iglesia Atventista no ta un iglesia ku ta buska pa imponé leinan i òrdu di Dios atraves di leinan humano. E trabou di kambia kurason di individuonan i pa trese hende den konformidat ku e boluntat di Dios ta trabou di Spiritu Santu. [5]

Nos por konkluí e ora ei ku iglesia mester duna gobièrnu, komo un entidat outónomo, espasio pa disidí liber loke e ta haña mihó pa e siudadanonan. Di otro banda gobièrnu su desishon no mester violá derechi di iglesia pa publiká, prediká, siña i apliká iglesia su forma di mira matrimonio, seksualidat, etc. Den e kaso aki libertat di religion, libertat di ekspreshon i libertat di konsenshi mester prevalesé. Maranata!


[1] https://www.christianitytoday.com/news/2019/january/nashville-statement-netherlands-lgbt-cbmw-dutch-christians.html

[2]https://www.adventist.org/en/information/official-statements/statements/article/go/-/marriage

[3] http://www.adventistliberty.org/method

[4] Génesis 1:26, 27; Salmo 8:4-9; Huan 14:2-5, 12, 13; Kolosensenan 2:16

[5] Todd McFarland. “Why Adventist Church Isn’t Taking Side on Same-Sex Marriage Case.” March 5, 2015:
http://www.adventistreview.org/news-commentary


Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh Day Adventist