Aña Nobo Tira Klaridat …

Nos ta den e último dianan di 2018 i den ménos ku un siman lo duna bon bini na aña 2019. Kasi tur kaminda, henter dia por skucha e notanan di e kantika ku ta bisa “aña nobo tira klaridat, riba tur ku ta move den skuridat.” E piesa aki ta indiká un anhelo pa un mihó aña. Ta parse ku kada biaha ku nos ta kuminsá un aña kalendario nobo, hende ta spera, deseá, i hopi biaha ta hasi resolushonnan pa un kambio pa bon den e aña nobo. Ademas, e kantika ta ekspresá deseo pa mira “kosnan kla, kosnan bon, kosnan bunita so.”

Ta bon pa nos tuma nota di e echo ku ta for di aña 1982 Doble R a saka e kantika aki. Kada aña di nobo, for di promé ku a komponé e kantika aki, i awe mas ku 35 aña despues ku e kantika a sali, nos ta biba ku e realidat di kada aña di nobo pa mira kosnan kla i skur, kosnan bon i malu, i kosnan bunita i mahoso. Evidentemente, nos lo mester sigui biba ku e realidat dual aki te dia “Señor mes lo baha for di shelu,”[1] i E “hasi tur kos nobo,”[2] anto ku E introdusí nos den “un shelu nobo i un tera nobo.”[3] Miéntras tantu, nos tin ku sigui biba ku speransa konfiando e palabranan di Hesukristu: “Despues di prepará un lugá pa boso, Mi ta bolbe bini i tuma boso serka Mi pa boso ta kaminda Mi ta.”[4]

Rekonosiendo e realidat di bida den un mundu kaminda tin kosnan bon, malu, dushi i peligroso, Beibel ta konsehá nos lo siguiente: “Pero, rumannan, boso no ta biba den skuridat i e dia ku Señor ta bini lo no sorprendé boso manera un ladron. Pasobra boso ta yu di lus, hende ku ta biba den klaridat di dia.”[5] Esaki ta nifiká, ku ounke nos ta rondoná di kosnan bon i malu. Ounke, lo tin hende ku ta “tira pieda skonde man” i keda leu for di alkanse di hustisia, ami ku bo por skohe pa “biba den klaridat di dia.” Biba den klaridat di dia, i ser un “yu di lus,” ta un eskoho personal. Ora ku Hesus a bisa Su disipelnan: “Boso ta lus pa mundu,”[6] E tabata papiando ku hende ku a skohe pa sigui E, por lo tantu nan a bira lus pa mundu.

Pues e anhelo pa “aña nobo tira klaridat, riba tur ku ta move denskuridat,” por bira realidat ora ami ku bo skohe pa sigui Hesus: “Ami ta É luspa mundu. Esun ku sigui Mi no ta kana nunka den skuridat, ma l’e tin lus ku taduna bida.”[7] Skoheawe pa sigui Hesukristu, nos bida lo tira klaridat i nos lo ta yunan di lus kuta biba den klaridat di dia, miéntras nos ta spera riba e dia ku nos lo mira “kosnankla, kosnan bon, kosnan bunita so.”[8]– Maranata!


[1] 1 Tesalonisensenan 4: 16

[2] Revelashon 21: 5

[3] Revelashon 21: 1

[4] Huan 14: 3

[5] 1 Tesalonisensenan 5: 4,5

[6] Mateo 5: 14

[7] Huan 8: 12

[8] Revelashon 21 i 22

Bo por komparti e artikulo

Share on facebook
Share on twitter
Share on whatsapp
Share on email
lodo sda church
UNION KARIBE HULANDES 
© 2018 Dutch Caribbean Union of Seventh Day Adventist